Улукбек Марипов айыл чарба кредиттерин берүү механизмин кайрадан карап чыгууну тапшырды

2021 жылдын 15 июлунда Кыргыз Республикасынын Министрлер Кабинетинин Төрагасы Улукбек Марипов «Айыл Банк» ачык акционердик коомунун башкармалыгынын төрагасы Улан Букабаевди кабыл алды.

Пикир алышууда банк секторундагы абал, айыл чарба кредиттерин берүүнү өнүктүрүү жана 2022-2023-жылга карай банктын артыкчылыктуу пландары талкууланды.

Министрлер Кабинетинин башчысы чакан жана орто бизнес компанияларын, анын ичинде тамчылатып сугаруу жана азык-түлүк коопсуздугун камсыз кылуу боюнча долбоорлорду колдоого алуу, колл-борборлордун ишин күчөтүү жана интернет-банкингди өнүктүрүү зарылдыгын белгиледи.

«Банктын толук санариптик трансформациясы керек, бул кардарларды сактап калууга гана эмес, ошондой эле кардарлар менен тыгыз кызматташууга жана алардын пикирин так түшүнүүгө мүмкүнчүлүк берген заманбап каналдарды пайдалануу менен банк ишин кеңейтүүгө жардам берет», - деди ал.

Улукбек Марипов белгилегендей, жыл сайын мамлекет тараптан «Айыл чарбасын каржылоо» долбоорун колдоо үчүн республикалык бюджеттен каржы булактары каралат, ал эми аталган кредиттик каражаттар ар дайым эле максаттуу жумшала бербейт.

«Айыл чарба өндүрүүчүлөрүнө 9 жылдан бери насыялар берилип келет, бирок агрардык сектордун өнүгүү динамикасы төмөнкү деңгээлде калууда. Кредиттерди берүү механизмдерин кайрадан карап чыгуу зарыл», - деп белгиледи Министрлер Кабинетинин башчысы.

Ошондой эле, Министрлер Кабинетинин Төрагасы ар кандай өндүрүүчүлөр тарабынан чыгарылган, заманбап мүнөзгө ээ болгон айыл чарба техникаларын лизинг шарттарында сатуу үчүн аларды талдоого алуу зарылдыгын белгиледи.